Reiknað með neyðarástandi: innflytjendaflæði vegna hruns evrusvæðis

Menn ættu að lesa þessa frétt á Mbl.is: Hertar innflytjendareglur ef evran hrynur. Nú eru brezk stjórnvöld að búa sig undir að það versta gerist í evrumálum: að evrusvæðið hrynji. Hömlur á flæði Grikkja og íbúa ESB-ríkja í A-Evrópu til Bretlands eru nú skipulagðar í "áætlun þar sem gert er ráð fyrir neyðarráðstöfunum í innflytjendamálum, eins og innanríkisráðherra Bretlands, Theresa May, upplýsti í dag.

Viðtalið var í dagblaðið Daily Telegraph og bent þar á í fréttinni "að íbúar allra Evrópusambandsríkja hefðu rétt á að starfa hvar sem væri á innri markaði sambandsins að undanskildum nýjustu ríkjum þess, Rúmeníu og Búlgaríu."

Ástandið virðist hafa versnað verulega á síðustu vikum:

• Vaxandi áhyggjur séu af því að Grikkland verði neytt til þess að yfirgefa evrusvæðið sem gæti orðið til þess að landið lenti í greiðsluþroti með þeim afleiðingum að milljónir misstu vinnuna og færi þá að svipast um eftir vinnu í öðrum löndum. (Mbl.is.)

Þetta er talið líklegt að hafi dómínóáhrif í öðrum evruríkjum, einkum í Suður-Evrópu og á Írlandi. "Bretland sé hins vegar álitið í betri málum vegna þess að það stendur utan evrusvæðisins," og það veldur ótta brezkra yfirvalda við straum atvinnulausra þangað, enda er för fólks innan Evrópusambandsins frjáls, skv. reglum innri markaðarins, en Bretar búa betur að því leyti, að þeur eru ekki í Schengen-kerfinu, auk þess sem þeim er heimilt að grípa til neyðarráðstafana við erfiðar aðstæður.

Til marks um alvöru málsins eru brezk yfirvöld jafnvel tilbúin "að flytja breska ríkisborgara á brott frá Grikklandi ef mótmæli í landinu fara úr böndunum og tryggja að þeir hafi aðgang að fjármunum ef bankar og hraðbankar á meginlandinu verða óaðgengilegir." (Mbl.is.)

En Samfylkingin á Íslandi heldur sér fast við sín ofsatrúarbrögð.

Hertar innflytjendareglur ef evran hrynur

Vertu ekki að látast, Jóhanna! Á stóli forsætisráðherra situr kona klumsa við sönnum ásökunum og margsek um lagabrot

Hver var það sem neyddi Ögmund Jónasson til að segja NEI við tillögu um þjóðaratkvæðagreiðslu um það, hvort hætta beri við ESB-umsókn? Sjálfur segir hann hana hafa aldrei verið vitlausari!

Jóhanna hóf ferilinn með stjórnarskrárbroti, beinu og skýru (gegn 20. greininni), við skipun norsks seðlabankastjóra.

Hún og Steingrímur brutu stjórnarskrána við vinnslu Icesave-málsins. Skutilsveinn hennar, Össur, þverbraut í leiðinni landráðalögin í sama máli.

Ásmundur Einar Daðason vitnaði á þingi í dag til orða Birgittu Jónsdóttur á Alþingi árið 2009:

• ""Í dag var hið andlega ofbeldi stundað fyrir opnum tjöldum af konu sem eitt sinn var álitin heilög, en ég hygg að sá ljómi sé óðum að hverfa. Því völd geta með sanni gert vænsta fólk að skrímslum. Það að horfa á hana þjarma að þingmönnum samstarfsflokksins eins og raun bar vitni og heyra mátti hótanir um að ef viðkomandi greiddi ekki atkvæði með samningum væri sá og hinn sami ábyrgur fyrir falli ríkisstjórnarinnar." Þetta sagði háttvirtur þingmaður Birgitta Jónsdóttir á sínum tíma," sagði Ásmundur og sakaði forsætisráðherra um að segja ósatt.
• Jóhanna sagði þessi ummæli þingmannsins væru ekki svaraverð og honum ekki samboðin. "Og ætla ég mér ekki að svara þeim," sagði Jóhanna. (Mbl.is.)

Þegar hún á engin svör við upprifjun á þessum orðum núverandi stuðningskonu sinnar, þumbast hún bara við, svarar engu nema út í hött. En ætli hún geri það sama í Héraðsdómi Reykjavíkur?

Jóhanna er nú í fréttum vegna tveggja lagabrota af hennar hálfu, annarra en þeirra, sem varða beinlínis stjórnarskrána:

1. Hún braut jafnréttislög við stöðuveitingu í eigin forsætisráðuneyti, sjá hér: Brotið gegn lögum án afleiðinga (frétt sem hefst þannig: "Kyndilberi jafnréttisbaráttunnar var Jóhanna Sigurðardóttir forsætisráðherra nefnd af ríkislögmanni í dómsal í dag. Var þar tekið fyrir skaðabótamál sem að grunni er sprottið upp úr úrskurði kærunefndar jafnréttismála, en í honum er Jóhanna sögð hafa gerst brotleg við jafnréttislög ...");

2. og Jóhanna þverbraut þingskaparlög í gær með því að taka til máls, þegar þingmenn gerðu grein fyrir atkvæði sínu um tillögu Vigdísar Hauksdóttur um þjóðaratkvæðagreiðslu um hvort draga eigi til baka Evrópusambands-umsóknina.

Fyrrverandi forseti Alþingis benti á þetta síðastanefnda lagabrot Jóhönnu í stuttri grein í dag: Nú fórstu yfir strikið, forsætisráðherra, sbr. einnig hér á Mbl.is: Alvarleg mistök að gefa Jóhönnu orðið. Jóhanna sat þarna ekki á þingi sem alþingismaður, enda var hún í leyfi frá því starfi, og Baldur Þórhallsson leysti hana af. BÆÐI töluðu þau, þegar þingmenn gerðu grein fyrir atkvæði sínu í málinu! Jóhanna telur sig greinilega yfir það hafna að þurfa að fara að lögum.

Nú hafa menn einna helzt það úrræði að taka þátt í áskorun á þessa sömu Jóhönnu að segja af sér fyrir sig og sitt ráðuneyti, það er á vefnum kjosendur.is! Nú hafa hátt á áttunda þúsund manns tekið þátt í þeirri undirskriftasöfnun á tæpum tveimur sólarhringum.

„Ekki beitt mér á einn eða annan hátt“

Mörður Árnason snýr sannleikanum á haus; og af öðru tilþrifaleysi fruntastjórnarsinna á degi ömurðarinnar

Það verður ekki þverfótað fyrir sannleiksníði Samfylkingar um Esb-mál í dag. Ummæli Marðar eru að inntaki engu skárri en heimskuhvæs Þráins Bertelssonar í Alþingi í hádeginu. Þráinn stígur ekki í rökræðuvitið, en Mörður bætir gráu ofan á svart með því að þykjast hafa fengið þýðingarmikið meirihlutaumboð til að innmúra Ísland í evrópskt stórveldi langflestra fyrrverandi nýlenduvelda heims.* ALDREI fengu stjórnarflokkarnir og Hreyfingar-viðhengi hennar umboð meirihluta kjósenda til að leita inngöngu í Evrópusambandið, og ALLAN TÍMANN FRÁ UMSÓKNINNI HEFUR ÞJÓÐIN VERIÐ ANDVÍG ÞVÍ AÐ GANGA Í EVRÓPUSAMBANDIÐ, samkvæmt hverri einustu skoðanakönnun, 16 talsins frá 4. ágúst 2009 til 27. apríl 2012.

Það vantar ekki, að Mörður sé orðhvatur eins og fleiri Samfylkingarjálkar í dag:

• Hann bætir við að eftir afgreiðslu Alþingis hafi utanríkisráðherra og viðræðunefnd Íslands "fullkomið umboð frá þinginu" til þess að halda viðræðum við Evrópusambandið áfram um aðild Íslands að því.

En:

1. "Fullkomið" er það umboð ekki, sem byggist á svikum við kjósendur og kosningaloforð Vinstri grænna. Aldrei fengu þeir umboð til þessa, ekki fremur en að svíkja þjóðina í Icesave-málinu. 
2. Ríkisstjórn, sem brátt er á faraldsfæti og nýtur aðeins stuðnings 31-33% kjósenda í síðustu skoðanakönnunum, hefur EKKI "fullkomið umboð" þjóðarinnar til verka sinna og alls ekki til að svipta okkur æðstu fullveldisréttindum í löggjafar- og öðrum málum og gefa Esb-þjóðum jafnan aðgang að fiskimiðum okkar milli 12 og 200 mílna.
3. Einna sízt hefur ríkisstjórnin umboð kjósenda til að halda áfram innlimunarviðleitni sinni í ESB -- einungis 27,5% aðspurðra eru hlynntir því í nýjustu skoðanakönnun, að Ísland gangi í Evrópusambandið.

Merði Árnasyni væri sæmst að halda sig við sannleikann hér eftir.

Steingrímur J. Sigfússon og hans lið er í bandi hjá Samfylkingunni, en sjaldan eða aldrei hefur einn þingflokkur liðazt í sundur sem hans: Lilja Mósesdóttir er farin, Atli er farinn, Ásmundur Einar er farinn, Guðfríður Lilja skarst úr hinum ljóta leik í dag og greiddi atkvæði með samvizku sinni og tillögu Vigdísar; Jón Bjarnason tollir enn í þingflokknum, en fylgir ekki fruntastefnu Steingríms og sízt í Evrópusambandsmálum, enda betur upplýstur um þau en flestir þingmenn. Ögmundur Jónasson greiddi atkvæði GEGN samvizku sinni í þessu máli í dag, en lá sennilega undir alvarlegri hótun: að verða vikið ella úr ríkisstjórninni eins og Jóni áður, en til þess má ekki koma, meðan Jóhönnustjórn lafir, því að Ögmundur er eina brjóstvörn þjóðarinnar í stjórnkerfinu gegn einfeldni og áhættuhegðan Jóhönnu og hennar liðs í Kínverjamálunum.

Þetta var ömurlegur dagur í þingsögunni; það sama á við um stjórnarskrármálið og ótrúlegt, hvað verið var að samþykkja þar: gersamlega vanbúnar tillögur um sex spurningar, loðnar og túlkanlegar á ýmsa vegu og ekkert á flestum þeirra neitt byggjandi, en samt ekki tekið í mál að lagfæra þær! Þingmenn stjórnarinnar að meðtöldu Hreyfingarfólki höguðu sér eins og andstæðingar rökhyggju og sannleiksleitar í þessu máli, en tjáðu einbeittan skoðanafantaskap sinn í ómældum mæli, þ. á m. Þráinn Bertelsson og Ólína Þorvarðardóttir. Raun er að því að hlusta á slíkan þingmeirihluta akta sig með þessum hætti. Yfir öllu vomaði svo Brusselmatrónan Valgerður Bjarnadóttir og virðist ætla að jarða það lýðveldi sem faðir hennar lagði svo mikið í að skapa góð stjórnlög.

Ekki vil ég skilja við lesendur án allrar vonar. Koma dagar eftir þennan dag, og það styttist óðfluga valdatímabil Steingríms og Jóhönnu. En hér eiga menn líka einna beztu vonina um að koma þessari ríkisstjórn frá: í undirskriftasöfnuninni á http://kjosendur.is. Þar var ég 1549. til að skrifa undir nálægt miðnætti fyrir sólarhring, en nú eru undirskriftirnar strax orðnar 7.408. Tökum öll þátt í þessu verðuga átaki.

* Tíu fyrrv. nýlenduveldi munu (frá 1. nóv. 2014) ráða 73,34% atkvæðavægi í ráðherraráði og leiðtogaráði Evrópusambandsins (sbr. hér), en hin 17 ríkin, saklaus af nýlendustefnu, munu ráða þar 26,66% atkvæðavægi ! Ísland fengi þar 0,06% atkvæðavægi !

ESB-viðræðurnar á fulla ferð

Esb-Árni Þór Sigurðsson reddar fundi utanríkismálanefndar með útþenslustjóra Esb. án þess að spyrja íslenzka þingmenn

Það er merkilegt að talað sé um fund útþenslustjóra Evrópusambandsins, Stefans Füle, með utanríkismálanefnd Alþingis, þegar þingflokksformaður Sjálfstæðisflokksins kannast ekkert við áform um slíkan fund, "og þó á ég sæti í þeirri ágætu nefnd," segir hin sama Ragnheiður Elín Árnadóttir á Facebók sinni.

En þeir virðast vita betur í framkvæmdastjórn (e.k. ríkisstjórn, réttu nafni: kommissararáði) Evrópusambandsins, því að tilkynningin um þennan fund með utanríkismálanefnd barst úr þeirri áttinni. Án þess að spyrja aðra nefndarmenn hefur þá 10 milljóna Evrópusambands-styrkþeginn Árni Þór Sigurðsson, formaður utanríkismálanefndar, líklega ákveðið þennan fund í samráði við vini sína, bossana í Brussel.

Füle (sjá þessa afhjúpun) verður hér í dag, fimmtudag, og á morgun, og nú væri tilvalið að mótmæla heimsókn hans eftir allar skráveifurnar sem þetta stórveldi hans hefur reynt að veita okkur:

1. Afstöðu með brezkum og hollenzkum stjórnvöldum í Icesave-málinu, m.a. með þátttöku framkvæmdastjórnarinnar (kommissaranna, en Füle er einn af þeim) í hraðsuðu-gervi-gerðardómi gegn okkur í málinu haustið 2008;
2. með því að sækja Icesave-málið enn gegn okkur fyrir EFTA-dómstólnum nú í vor og sumar;
3. með ófyrirleitinni, ótrúlega grófri ásækni gegn fiskveiðiréttindum Íslendinga í okkar eigin efnahagslögsögu (makrílmálið);
4. með hótun um viðskiptabann gegn okkur vegna sama máls !
5. með hundraða milljóna króna áróðursherferð, nýhafinni, fyrir innlimun ríkis okkar í stórveldið Esb.
6. með íhlutun sendiherra Esb., Timo Summa, í íslenzk innanríkismál, með predikunarferð um landið og óleyfilegum aðgerðum sendiráðsins skv. Vínarsamningnum (áður rætt hér á vef mínum, en bezt af Tómasi Inga Olrich, fv. sendiherra okkar), og með nýrri og ósvífinni íhlutun sendiherra voldugasta Esb-ríkisins, Þýzkalands.

En Árni Þór Sigurðsson mun ugglaust taka á móti Füle opnum örmum, gott ef þeir taka ekki smá-sovézkt Bresjnev-knús til bragðbætis, enda báðir gamlir Moskvukommar frá þeim dýrðarinnar dögum.

En nú hafa þeir fundið sína Nýju-Útópíu, rétt eins og gamli Maóistinn Jose Manuel Barroso. Og takið eftir: Árni Þór segir ekki koma til mála að leyfa þjóðaratkvæðagreiðslu um hvort binda eigi enda á Esb-umsóknina. Füle getur ekki verið ánægðari með sinn gamla kammerat.

PS. Endilega lítið á greinar mínar tvær um þingumræðuna í morgun og fram yfir hádegið, hér á vefsíðu Samtaka um rannsóknir á Evrópusambandinu og tengslum þess við Ísland: fullveldi.blog.is.

Kannast ekki við fund með Füle

Undarlegt undanhald forystu Sjálfstæðisflokks og Framsóknar í stjórnarskrármáli

Það er rétt hjá Birni Bjarnasyni, fyrrv. mennta- og dómsmálaráðherra, að það er "óskiljanlegt að stjórnarandstaðan hafi samið um það við stjórnarmeirihlutann að ljúka umræðum um þingsályktunartillögu um þjóðaratkvæði um tillögu stjórnlagaráðs að nýrri stjórnarskrá."

Ég var viðstaddur þingumræðu um málið síðdegis á nýliðnum þriðjudegi, og það var alveg ljóst, að málið allt er vanreifað eins og frekast má verða!

Þótt alveg væri litið fram hjá umboðsleysi og ólögmæti stjórnlagaráðs og þótt sumt í tillögunum, sem þar komu fram, sé vel viðræðuhæft og hugsanlega samþykkjanlegt með tíð og tíma inn í okkar lýðveldisstjórnarskrá, þá er í 1. lagi óþolandi sú ófyrirleitni stjórnlagaráðsmanna að fara langt út fyrir jafnvel það umboð, sem 30 þingmenn veittu þeim (í óleyfi auðvitað) með því að búa sér til heila stjórnarskrá til að geta skrúbbað út hinni, sem nokkuð vel hefur gefizt, á einu bretti! Og þegar andað er á þessa ofdirfsku, hefur Þorvaldur Gylfason einfaldlega í hótunum!

Í 2. lagi kom afar skýrt fram í þingumræðum í gær, að spurningarnar fimm, sem handvaldar voru af ríkisstjórnarliðinu (EKKI af landskjörstjórn) til að leggja fyrir kjósendur í haust, auk einfaldrar, loðinnar spurningar um stjórnarskrárdrögin sem slík, eru gersamlega óhafandi í núverandi formi, óljósar og ekkert í raun á flestum þeirra byggjandi um það form eða inntak þess forms sem menn vilji hafa á viðkomandi hlutum, t.d. um persónukjör, jöfnun atkvæðaréttar, þjóðareign á auðlindum o.fl.

Í 3. lagi hafa svo vitaskuld stjórnarþingmenn engin rök fyrir því, af hverju aðeins eigi að spyrja þessara fimm krossaprófs-spurninga, en EKKI t.d. um heimild til fullveldisframsals lýðveldisins! (111. gr. draganna).

Öllu er þessu hagað að vild og geðþótta ríkisstjórnarsinna, vinstri manna sem fyrir fáeinum árum fengu það samþykkt í þáverandi stjórnarskrárnefnd undir forystu Jóns Kristjánssonar alþm., að ekkert yrði þar ákveðið um stjórnarskrá nema í breiðri sátt við alla þingflokka þáverandi stjórnarandstöðu (vinstri flokkanna)! En nú ríkir geðþóttastjórnarfar naums meirihluta, sem hangir á horriminni, upp á náð og miskunn Hreyfingarinnar komin, þeirrar sömu hreyfingarlausu Hreyfingar sem lét ekki sjá sig í þingsal Alþingis á þessu þriðjudags-síðdegi, þegar ég staldraði við þar á áheyrendapöllunum í tvo tíma, -- eins og þessi Hreyfing er þó búin að hamra á því að þessi stjórnarskrártillaga fáist rædd og afgreidd!!

Jú, ég sá Þór Saari bregða fyrir sem snöggvast í hliðarsal utan þingfundarins, en hann var víst of merkilegur til að vilja ræða stjórnarskrármálefni. Eflaust fylgir hann 111. greininni með fullveldisframsals-heimildinni eins og öllu öðru í tillögudrögum stjórnagaráðs, og sjálfur hefur hann tekið harða afstöðu gegn því að leyfa það, að hætt verði við umsóknina um Evrópusambandsinnlimun. En af hverju getur hann ekki unnt þjóð sinni þess að fá tækifæri til að segja álit sitt á þeirri umsókn og því aðlögunarferli í þjóðaratkvæðagreiðslu í haust? Tillaga Vigdísar Hauksdóttur þar um, þ.e. spurningin sem lögð yrði fyrir kjósendur, er þó a.m.k. miklu skýrari heldur en hinar loðnu 5-6 spurningar sem nefnd undir foyrstu Brusselkonunnar Valgerðar (systur Björns hér ofar!) lætur sér þókknast að gefa kjósendum færi á að svara viðvíkjandi stjórnarskrármálum.

Það er algerlega rétt hjá Vigdísi Hauksdóttur, að miklu fleiri -- sennilega um 80% manna með kosningarrétt -- myndu taka þátt í þjóðaratkvæðagreiðslu í haust, ef þar væri ekki aðeins lögð fyrir kjósendur óbindandi skoðanakönnun um stjórnarskrárdrög og 5 spurningar, heldur einnig spurningin um hvort binda beri enda á Esb-umsóknina. En það er eins og stjórnarliðið vilji, að fyrst og fremst verði það fremur lítill hópur sérlegra áhugamanna um þessi stjórnarskrárdrög sem láti sýna sig í þjóðaratkvæðagreiðslunni í haust! Niðurstaðan gæti orðið jafn-dræm þáttaka og í kosningunum til stjórnlagaþings -- þess þings sem 30 þingmenn svínuðu á þvert gegn lögum landsins.

Ásmundur Einar Daðason sagði réttilega í þingræðu í gær, að eðlilegt og heppilegt væri að láta fara fram þjóðaratkvæðagreiðslu um Esb-umsóknina á sama tíma og kosið yrði um spurningarnar um stjórnarskrármálið. Hann hrakti fimlega mótrök gegn þeirri tillögu, m.a. þau gagnrök Lúðvíks Geirssonar Samfylkingarþingmanns, að þarna væri um eðlisólík mál að ræða, þ.e. stjórnarskrá og Esb-umsókn. Ásmundur benti á, að sjálfir hafi stjórnarþingmenn ætlað sér að leggja fram þessi stjórnarskrárdrög (og handvöldu spurningarnar) jafnhliða forsetakosningunum í sumar, sem sé eðlisólíkum kosningum!

Allt loft úr stjórnarandstöðunni

Stjórnarþingmenn SKRÓPA á þingfundi ALÞINGIS, en MÆTA á fundi Samfylkingar og Vinstri grænna!

Argasta hneisa er það fyrir löggjafarþingið sem hér gerðist í dag. Sjálfur sat ég á þingpöllum og furðaði mig á, að stjórnarþingmenn létu ekki sjá sig í salnum, hvað þá ráðherrar. Var þó verið að ræða sjálft STJÓRNARSKRÁRMÁLIÐ. Margt var þar lærdómsríkt, en ekki komst það inn í hausinn á stjórnarþingmönnum, sem völdu í staðinn að halda bara fundi í eigin þingflokkum!!! Nú gæti mikið staðið til, svo sem að beita hér þingskaparreglu sem hefur ekki verið notuð í 80 ár, um stöðvun umræðra, og hefur þó naumast nokkur gert ráð fyrir því snemma á 20. öld, að einhvern tímann gæti staðið til að banna málsfrelsi og umræður um svo stórt mál sem það að keyra áfram með tillögur um að skipta út stjórnarskránni fyrir stórgallað plagg, sem fjöldi lögfræðinga hefur gagnrýnt og inniheldur m.a. auðvelda leið Esb-innlimunarsinna til að renna sem hraðast og léttast í gegn fullveldisframsalstillögu sem snýst um að innlimast í erlent stórveldi.

Seta mín á þingpöllunum (ýmis einn eða með 1-2 öðrum þar á sama tíma, frá því um kl. 2 til 4) var gefandi sem oftar. ENGINN stjórnarþingmaður lét sjá sig í ræðustóli. Ræðumenn leiddu mér enn skýrar fyrir sjónir, hve vangæfar spurningarnar fimm eru, auk aðalspurningarinnar - flest af þessu óljóst og þokukennt í raun! Og svo er fólkinu ekki gefinn kostur á að krossa bara við, að það vilji gömu stjórnarskrána áfram, né að fá að beita sér gegn 111. greininni með ákvæðinu ljóta um fullveldisframsal.

Og Vigdís Hauksdóttir fekk þarna góðan stuðning stjórnarandstöðu við sína frábæru breytingartillögu um að sett verði líka í sömu þjóðaratkvæðagreiðslu að fólk geti valið um, hvort það vilji láta hætta Evrópusambands-umsóknarferlinu.

Héldu þingflokksfundi

Handarbakavinnubrögð stjórnarmeirihluta í stjórnarskrármáli - og allt í þágu fullveldisafsals

Nú hafa þau skipað áhrifalitla gervinefnd til að fara yfir blöskranleg drög ólöglegs, valdfreks "stjórnlagaráðs" að glænýrri stjórnarskrá. Valgerður Bjarnadóttir vill eins og Þorvaldur Gylfason útrýma "Gömlu-Gránu" sem afhjúpar stjórnarskrárbrot Jóhönnu,* og saman vilja þær stöllur notfæra sér heimskulega ósvífna grein í stjórnarskrárdrögunum til að troða Íslandi inn í Evrópusambandið næst þegar vel viðrar fyrir þær í skoðanakönnunum eftir magnaða áróðursherferð Esb. og dindla þess hér á landi.

Það er ekki mikill vandi að demba áróðri yfir 300.000 manna samfélag. En þetta buðu Vinstri grænir upp á með því að skrifa upp á umsókn Jóhönnu- og Össurrargengisins þvert gegn eigin kosningaloforðum, og VG hættir ekki "vegferðinni" hættulegu og mótmælir ekki einu sinni, þegar 230 millj. kr. ólöglegt Evrópusambands-áróðursbatterí fer af stað, virðist jafnvel ætla að liðka fyrir hneykslanlegum 5 milljarða IPA-styrkjum þvert á mörg íslenzk lög!

Undantekningarnar, sem sanna þó regluna um VG-aumlegu meðvirknina, eru Jón Bjarnason og Ögmundur Jónasson, en Esb-þjónninn Steingrímur segir ekki múkk, enda einstakt ragmenni á þessu sviði, og varaformaðurinn hún Katrín litla fylgir pen sínum formanni eins og fyrri daginn, á meðan böðlarnir Björn Valur Gíslason og Árni Þór Sigurðsson keyra málin áfram fyrir Þistilfjarðardrauginn. Böðla kalla ég þá fyrir að böðlast á þjóðarréttindum í Icesave- og Esb-málum.

• Stjórnskipunar- og eftirlitsnefnd Alþingis hefur fengið hóp lögfræðinga til þess að fara yfir tillögur stjórnlagaráðs með tilliti til lögfræðilegra atriða. Hópinn skipa Hafsteinn Þór Hauksson, Ragnhildur Helgadóttir, Oddný Mjöll Arnardóttir, Páll Þórhallsson og Guðmundur Alfreðsson.
• Þetta er svona þröngt skilgreint verkefni um að það sé ekkert þarna sem stangist á og að þetta sé frá lögfræðilegu sjónarmiði alveg pottþétt. En þetta er ekki nefnd og þessu fólki er ekki ætlað að koma með nýjar tillögur eða eitthvað svoleiðis."
• Þetta segir Valgerður Bjarnadóttir, formaður stjórnskipunar- og eftirlitsnefndar Alþingis, í umfjöllun um þetta mál í Morgunblaðinu í dag, spurð út í hlutverk þessara lögfræðinga. (Mbl.is.)

Hafið þið vitað það hlálegra? Þarna fá þau mikla bóga eins og Ragnhildi Helgadóttur prófessor, Pál Þórhallsson, skrifstofustjóra löggjafarmála hjá forsætisráðuneytinu, og Guðmund Alfreðsson þjóðréttarfræðing til að segja sitt um hin stórgölluðu drög hins ólögmæta ráðs að nýrri stjórnarskrá, en tryggilega skal gengið frá því, að þetta sé "ekki nefnd og þessu fólki er ekki ætlað að koma með nýjar tillögur eða eitthvað svoleiðis," með sérkennilegu orðalagi Valgerðar Bjarnadóttur, sem hefur lengi alið aldur sinn í Brussel og haft viðurværi sitt af störfum þeirra hjóna þar.

Gráu gat þetta Esb-lið Samfylkingar bætt ofan á svart, lesið þetta í fréttinni:

• Áætlað er að þjóðaratkvæðagreiðsla um tillögur stjórnlagaráðs fari fram í haust og því myndu niðurstöður hópsins líklegast ekki birtast fyrr en að henni lokinni.

Það verður sem sé tryggilega gengið frá því, að gagnrýni þessarar sérfræðinefndar lögfróðra skuli EKKI SJÁST FYRR EN EFTIR ráðgefandi skoðanakönnunina,** sem þau kalla "þjóðaratkvæðagreiðslu" -- það á ekkert að trufla þjóðina frá því að segja já við þessum stórgölluðu drögum, alls ekki að sýna þjóðinni réttmæta gagnrýni á hana. Og þjóðin á ekki að geta leiðrétt gallana, það verður falið þinginu einu, helzt Fjórflokknum!

Og sjáið þið undanfærslusvörin sem þessi manneskja telur sig komast upp með í viðtali við fréttamann Mbl.is: 

• Aðspurð hvort niðurstöður svona sérfræðivinnu séu ekki eitthvað sem sé líklegt til að hafa áhrif á vilja kjósenda segist Valgerður ekki telja að svo sé. [!!! - innskot jvj.], "vegna þess að það er verið að fjalla um nákvæmlega sömu tillögurnar, þessum hópi er ekki ætlað að gera neinar efnislegar breytingar á þessum tillögum,“ segir hún. [!!!]

Valgerður ætlar að eiga kökuna og éta hana, láta framkvæma þessa krítísku skoðun, en fela hana fyrir þjóðinni og hirða svo eftir á það úr gagnrýninni, sem Samfylkingu þykir bitastætt (t.d. hugsanlega frekari skerðingu á valdi forsetans), eða það sem þingmenn flokksins komast ekki hjá að taka tillit til, svo að ekki blasi við þverstæðufull vitleysa. En að raskað verði við því að búið sé þarna í haginn fyrir fullveldisframsal í þágu hennar heittelskaða Evrópusambands, það kemur vitaskuld ekki til greina í smáum hugarheimi Valgerðar Bjarnadóttur.

Grein eftir mig um stjórnlagaráðs-hneykslið, hvernig það var ólöglega skipað, hef ég sent Morgunblaðinu. En ég vil sérstaklega hér í lokin benda á afbragðsgóð leiðaraskrif þess blaðs í dag. Átakanlegt átak nefnist sú ritstjórnargrein og fjallar um ýmislegt og ekki neitt (afrek Jóhönnustjórnar á atvinnusviði og "átak" hennar eftir yfirvofandi endadægur), og þar segir líka (feitletrun mín):

Og nú er þinginu haldið frá nauðsynjamálum vegna þess að ríkisstjórnin vill að fá afgreidda tillögu um að láta þjóðina segja álit sitt á sérkennilegum drögum að breytingum á stjórnarskrá. En það eru hrein ósannindi. Ekkert slíkt stendur til. Ríkisstjórnin þorir ekki fyrir sitt litla líf, og smáttið er það, að sýna þjóðinni þann texta og láta hana kjósa. Í staðinn er búinn til einfeldningslegur spurningalisti til hliðar við málið en atkvæðagreiðslan um hann hefur enga eiginlega merkingu. Líklegast er því að þjóðin muni leiða þennan óvitagang hjá sér. En þó mun þetta brölt kosta einar 200 milljónir í viðbót við þau hundruð milljóna sem þegar eru farnar. Verður þá heill milljarður fokinn út í buskann til að kosta árásina á stjórnarskrána.

Það er opinbert leyndarmál að leikurinn í kringum þá árás er settur á svið til þess eins að fela að ríkisstjórnin á í því aðeins eitt erindi. Hún vill fá heimild til að semja frá þjóðinni drjúgan hluta af fullveldi hennar. Í því furðulega krossaprófi sem á að láta þjóðina fást við nú er þó ekki minnst á þetta atriði, sem allt bröltið snýst þó um!

* "Gamla-Grána" er niðrunarheiti Þorvaldar á Stjórnarskrá Lýðveldisins Íslands.

** Ámóta marktæka og skoðanakönnun Ingibjargar Sólrúnar um Reykjavíkurflugvöll.

Rýna í stjórnlagaráðstillögurnar

Þverstæðuáhrif sjávarútvegsfrumvarpa - ráðherrar í stríði við sjávarútveg

Ógæfuferli ríkisstjórnarinnar linnir ekki. Hún egnir landsbyggðina gegn sér. Allir sérfróðir mæla móti sjávarútvegsfrumvörpum hennar. Að óbreyttu myndu þau hafa "mikil áhrif á Landsbankann. Þau draga úr virði bankans og þar með verðmæti eignarhluta ríkisins," segir Steinþór Pálsson, bankastjóri Landsbankans, sem er að mestu í eigu ríkisins. Frumvörpin, verði þau að lögum, munu bitna hart á mörgum sjávarbyggðum og þar með útsvörum þar, hafnargjöldum og rekstrargrundvelli sveitarfélaganna, enda taka margir sveitarstjórnarmenn þátt í kynningarátaki í Sjónvarpi um þessi mál. Ekki bætir úr skák, ef Atvinnuleysistryggingasjóður þarf að fara að punga út vegna gjaldþrota sjávarútvegsfyrirtækja á næstu árum.

Það er undarlegt, eftir allan svikaferil Jóhönnustjórnar, að vera með sjávarútvegsráðherra sem er kominn í stríð við sjávarútveginn í landinu. Refsleg undanbrögð hans í ankannalegu drottningarviðtali í Silfri Egils í gær ná ekki að leyna þeirri staðreynd. Samt eru hann og Jóhanna, sem eru trausti rúin, að reyna á allra síðasta ári sínu í valdastólum að setja lög um sjávarútveginn til ársins 2052!!!

Það eðlilegasta í heimi er, að þau verði hrópuð niður.

Veiðigjöldin myndu rýra eign ríkisins

Gervipólitík Gumma Steingríms og svikamakk Hreyfingarinnar: valdinu þjónað, þótt augljóst sé, að það er á útleið

Það er nánast paþetískt að horfa upp á Jóhönnu, Steingrím og Guðmund Steingrímsson kjá hvert við annað og búa til eitthvert frumkvæðishlutverk hans í hinni fráleitu þriggja ára áætlun Jóhönnuóstjórnar um aukna atvinnu á kostnað sjávarútvegs í landinu. Þegar eftir var gengið, var hlutverk Guðmundar rýrt í roðinu, en ekki vantaði að hann reyndi að sýnast ábúðarmikill á svip, þótt augljóst væri, að þetta var allt eitt heljarinnar húmbúkk til að réttlæta það að hann yrði 5. hjólið undir ríkisstjórnarskrjóðnum.

Hreyfingin hefur selt andstæðingunum sálu sína, þ.e.a.s. ríkisstjórninni, og saman reynir þetta óþjóðholla gengi að troða upp á landsmenn glænýrri, stórgallaðri stjórnarskrá og vílar ekkert fyrir sér í þeim efnum, hvorki stjórnarskrárbrot, kosningalagabrot, brot gegn lögunum um stjórnlagaþing, svæsna viðleitni í stjórnarskrárdrögunum til að búa til sem auðveldasta leið fyrir Esb-dindlana til að fórna fullveldi landsins sem hraðast og auðveldlegast né heldur að gefa almenningi enga valkosti sem heitið geti í mótun eða breytingum á þeim stjórnarskrárdrögum. Nánast allt skal þar koma tilbúið ofan frá, þ.e.a.s. frá hágöfugum, umboðslausum "ráðsmönnum" í kolólöglegu "stjórnlagaráði.

Þau eiga það sammerkt, Hreyfingin og Gummi Steingríms, að þeim finnst sjálfsagt að þjóna valdinu í Stjórnarráði Íslands, þótt augljóst sé, að það er á útleið eftir innan við ár. Þvílík skammsýni, og hafa menn nokkurn tímann veðjað á vitlausari hest?

„Semja látlaust við aðra flokka“

7,5 milljóna Esb-maður leysir af Esb-konuna Jóhönnu á Alþingi

Hér er um að ræða Baldur Þórhallsson.* Má nú gera ráð fyrir, að hann taki höndum saman við 10 milljóna Esb-manninn Árna Þór Sigurðsson um "farsæla" refjastefnu í því efni að starfa gegn sjálfstæði landsins og fullveldi. Nú geta þeir t.d. unnið að því baki brotnu að fá rangnefnt "frumvarp" hins ólöglega stjórnlagaráðs samþykkt, en þar komu Esb-hollir ráðsmenn því svo fyrir, að ákvæði væri sett inn sem gerir fullveldisframsal heimilt með einfaldri þjóðaratkvæðagreiðslu eftir massífa milljónahundraða-áróðursherferð Evrópusambandsins, sem fylgir í kjölfar mútu- og mýkingarstarfsemi þess hér á landi, í lúmskum langtíma-undirróðri og styrkjagjöfum meðal ótal félaga, á sviði háskólasamfélags, verkalýðshreyfingar, lista og menningar, og í stjórnkerfinu.

Á annan tug ákvæða eru í núverandi stjórnarskrá, sem gera fullveldisframsal af þessu tagi gersamlega ólöglegt. Þetta var þyrnir í augum Esb-sinna eins og Þorvaldar Gylfasonar, Illuga Jökulssonar, Eiríks Bergmanns Einarssonar (sem er og var á launum í þágu Esb-sameiningar), Gísla Tryggvasonar, Pavels Bartozek, Þórhildar Þorleifsdóttur, Vilhjálms Þorsteinssonar o.fl. sem brugðizt hafa þjóðinni með þessari lymskulegu fullveldisframsalsgrein!

* Baldur er þekktur sem eilífur augnakarl í spjallþáttum Rúvara og 365 fjölmiðla og prófessor í Evrópufræðum við Háskóla Íslands. Hefur hann lengi, með sínum hætti, mælt með innlimun Íslands í evrópska stórveldið.